யோனா – ஒரு நடைமுறை மனிதன் – பகுதி 1 ( வீழ்ச்சியும் ஜெபமும்)

யோனா 1:3

அப்பொழுது யோனா கர்த்தருடைய சமூகத்தினின்று விலகி, தர்ஷீசுக்கு ஓடிப்போகும்படி எழுந்து, யோப்பாவுக்குப் போய் தர்ஷீசுக்குப் போகிற ஒரு கப்பலைக் கண்டு, கூலி கொடுத்து, தான் கர்த்தருடைய சமூகத்தினின்று விலகும்படி, அவர்களோடே தர்ஷீசுக்குப் போகக் கப்பல் ஏறினான்.

அபிஷேகத்தின் வல்லமை

யோனா ஒரு தீர்க்கதரிசியாக அபிஷேகம் பெற்றிருந்தான். தேவன் பேசும்போதெல்லாம், அவன் அதை அறிவித்தான். அவன் வாழ்க்கையில் ஒரு சிறப்பான அபிஷேகம் இருந்தது.

வேதாகமத்தில், தேவனுடைய வார்த்தையை விட்டு விலகிய மற்ற மனிதர்களைப் பார்க்கும்போது, அபிஷேகம் அவர்களை விட்டு நீங்கியதையோ, அல்லது அவர்கள் பாவத்திற்காக தேவன் கொடுத்ததை இழந்ததையோ பார்க்கிறோம். இதற்கு சிம்சோனையும் ராஜாவாகிய சவுலையும் உதாரணமாகக் காணலாம்.

ஆனால் யோனா வித்தியாசமானவன். அவனுடைய அபிஷேகம் அவனைத் திரும்ப அழைத்தது. அது அவனைச் சிட்சித்து, மீண்டும் தேவனுடைய வழிக்குக் கொண்டுவந்தது.

அபிஷேகம் உடன்படிக்கைக்குள் கொண்டுவருகிறது

யோனா தேவனுடைய சமூகத்திலிருந்து விலகி ஓடத் தீர்மானித்தான். ஆனால் அவன் தனியாக ஓடவில்லை. அவன் பணம் செலுத்தி அந்தக் கப்பலில் ஏறியபோது, அவனுடைய தீர்மானத்தின் விளைவுகள் அந்தக் கப்பலையும் அதன் மாலுமிகளையும் பாதிக்கத் தொடங்கின.

இன்று, தேவனுடைய பிள்ளையாகிய நீங்கள், உங்கள் பணத்தை எங்கே செலவிடுகிறீர்கள் என்பதை நினைவில் கொள்ளுங்கள்.

அசுத்தமான இணைய தளங்களுக்கும், தேவனுடைய திட்டத்திலிருந்து உங்களை விலகச் செய்யும் செயல்களுக்கும் பணம் செலுத்தும்போது, நீங்கள் அவற்றில் பங்குகொள்கிறீர்கள் என்பதை நினைவில் கொள்ளுங்கள். அவற்றை நீங்கள் உங்கள் வாழ்க்கைக்குள் உரிமையுடன் கொண்டு வருகிறீர்கள்.

அது உங்கள் அபிஷேகத்தையும் பாதிக்கக்கூடும்.

தேவன் கொடுத்த அபிஷேகம், அவருடைய நோக்கத்திற்கு விரோதமான ஒரு வழியில் நீங்கள் தொடர்ந்து செல்ல அனுமதிக்காது. சில நேரங்களில், உங்களைத் திருத்தி, மீண்டும் அவருடைய வழிக்குக் கொண்டுவருவதற்காக அபிஷேகம் உங்களைச் சிட்சைக்கு நடத்தும்.

அதே நியமம் நாம் ஒருவரிடமிருந்து பணத்தைப் பெற்றுக்கொள்ளும்போதும் பொருந்தும்.

நீங்கள் ஏன் அந்தப் பணத்தைப் பெறுகிறீர்கள், யாரிடமிருந்து பெறுகிறீர்கள் என்பதை நிச்சயமாக அறிந்துகொள்ளுங்கள். அந்தப் பணத்தின் நோக்கமும் உங்களைப் பாதிக்கக்கூடும்.

இதனால்தான் லஞ்சம் வாங்கக்கூடாது, வாக்களிப்பதற்காக பணம் வாங்கக்கூடாது, அல்லது சட்டத்திற்கும் நீதிக்கும் விரோதமான ஒரு காரியத்திற்காக அன்பளிப்புகளைப் பெற்றுக்கொள்ளக்கூடாது.

யாராவது உங்களுக்கு பணத்தையோ பரிசையையோ கொடுக்கும்போது, அதன் மதிப்பை மட்டும் பார்க்காமல், அதன் நோக்கத்தை அறிந்து பகுத்தறியுங்கள்.

தேவன் உங்களுக்குக் கொடுத்த ஆசீர்வாதங்கள், அவர் விரும்புகிற விதத்திலேயே பயன்படுத்தப்பட வேண்டும். 

வனாந்தரத்திலும் அபிஷேகத்தின் வல்லமை

யோனா 2ஆம் அதிகாரம் அவனுடைய ஜெபத்தைப் பற்றி பேசுகிறது.

இப்போது யோனா ஒரு மீனின் வயிற்றில் இருந்தான். ஆனாலும், அவன் அபிஷேகத்தோடு ஜெபித்துக்கொண்டிருந்தான். அதை எவ்வாறு சொல்லலாம்?

அவனுடைய ஜெபத்தைப் பாருங்கள்.

யோனா 2:6

பர்வதங்களின் அடிவாரங்கள் பரியந்தமும் இறங்கினேன்; பூமியின் தாழ்ப்பாள்கள் என்றென்றைக்கும் என்னை அடைக்கிறதாயிருந்தது; ஆனாலும் என் தேவனாகிய கர்த்தாவே, நீர் என் பிராணனை அழிவுக்குத் தப்புவித்தீர்.

அவன் தன் நிலையை அறிக்கையிட்டான், தன்னைக் குறித்து தீர்க்கதரிசனமாகப் பேசினான், அவன் தேவன் தரப்போகிற விடுதலையை விசுவாசத்தினால் கண்டான்; அதை நேரடியாக அனுபவிப்பதற்கு முன்பே அதைக் குறித்து பேசினான்.

கிருபையை அசட்டை செய்கிறவர்களைக் குறித்தும் அவன் தீர்க்கதரிசனமாகப் பேசினான்.

யோனா 2:8

பொய்யான மாயையைப் பற்றிக்கொள்ளுகிறவர்கள் தங்களுக்கு வரும் கிருபையைப் போக்கடிக்கிறார்கள்.

தேவனுடைய வார்த்தையை அறிக்கையிடுவதின் வல்லமை

யோனா தவறான அடிகளை எடுத்திருந்தாலும், அவன் ஜெபிப்பதை ஒருபோதும் நிறுத்தவில்லை.

அவனுடைய அபிஷேகம் அப்படியே இருந்தது. மீனின் வயிற்றுக்குள்ளும் அவன் அறிக்கையிட்டுக்கொண்டே இருந்தான்.

யோனா, சங்கீதம் 91-ன் வார்த்தைகளை, அவன் இவ்வாறு சொல்லத் தொடங்கினான்:

யோனா 2:2 - "என் நெருக்கத்தில் நான் கர்த்தரை நோக்கிக் கூப்பிட்டேன்; அவர் எனக்கு உத்தரவு அருளினார்; நான் பாதாளத்தின் வயிற்றிலிருந்து கூக்குரலிட்டேன், நீர் என் சத்தத்தைக் கேட்டீர்.

சங்கீதம் 91:15 - "அவன் என்னை நோக்கிக் கூப்பிடுவான், நான் அவனுக்கு மறுஉத்தரவு அருளிச்செய்வேன்; ஆபத்தில் நானே அவனோடிருந்து, அவனைத் தப்புவித்து, அவனைக் கனப்படுத்துவேன்.

யோனா அதையே செய்துகொண்டிருந்தான். அவன் தேவனை நோக்கிக் கூப்பிட்டான்.

ஆகையால், நீங்கள் உங்கள் வாழ்க்கையில் ஒரு கடினமான சூழ்நிலையில் இருக்கும்போது, நீங்கள் காண்கிறதை மட்டும் பேசாதீர்கள். நீங்கள் காண்கிற சூழ்நிலையின் மீது தேவனுடைய வார்த்தையைப் பேசுங்கள்.

உங்கள் சூழ்நிலை ஒன்றைச் சொல்லலாம். ஆனால் தேவனுடைய வார்த்தை வேறொன்றைச் சொல்கிறது. தேவனுடைய வார்த்தையை அறிக்கையிடுங்கள்.

துதி மற்றும் நன்றியறிதலின் வல்லமை

எபிரெய மொழியில் நன்றியறிதலுக்காகப் பயன்படுத்தப்படும் ஒரு அழகான வார்த்தை:

תּוֹדָה — Todah (தோதா) தோதா என்பது நன்றியறிதல், அறிக்கை, துதி ஆகியவற்றோடு தொடர்புடையது. இது நன்றியின் காணிக்கை அல்லது பலி என்ற கருத்தையும் கொண்டுள்ளது.

இதுவே யோனாவின் ஜெபத்தை மிகவும் வல்லமையுள்ளதாக ஆக்குகிறது. யோனா, தேவனை அறிக்கையிட்டு, துதித்து, நன்றி செலுத்திக்கொண்டிருந்தான். அவன் தன் காணிக்கைகளைச் செலுத்துவதாகவும் வாக்குக்கொடுத்தான்.

யோனா 2:9 “நானோ ஸ்தோத்திர சத்தத்தோடே உமக்குப் பலியிடுவேன்.”

இதில் ஒரு முக்கியமான காரியம் இருக்கிறது. யோனா விடுதலைக்காக தேவனிடம் கேட்டுக்கொண்டது மட்டுமல்ல. தேவன் தரப்போகிற விடுதலைக்காக அவன் அவருக்கு நன்றி செலுத்தினான்.

அதன் பின்னர் ஒரு காரியம் நடந்தது.

யோனா 2:10 - “அப்பொழுது கர்த்தர் மீனுக்குக் கட்டளையிட்டார்; அது யோனாவைக் கரையில் கக்கிவிட்டது.”

யோனா ஜெபித்தான்! .அவன் அறிக்கையிட்டான்!. அவன் துதித்தான்!. அவன் தேவனுக்கு நன்றி செலுத்தினான்!.

இறுதியாக, யோனாவின் மேல் இருந்த அபிஷேகம் அவ்வளவு வல்லமையாக இருந்ததால், அந்த மீன் அவனை வாந்தியெடுத்து வெளியே தள்ளியது. அது அவனைத் தன்னிடத்தில் வைத்திருக்க முடியவில்லை.

இன்று, பிசாசு உங்களைச் சூழ்ந்திருக்கலாம். ஆனால் நீங்கள் அபிஷேகத்தோடு ஜெபிக்கத் தொடங்கும் அந்தக் கணத்தில், அவனால் உங்களைத் தொடர்ந்து பிடித்து வைத்திருக்க முடியாது.

நீங்கள் அங்கிருந்து வெளியேறி வருவீர்கள்!.